Clinics and Pharmacies

Urganch aeroportini modernizatsiya qilish loyihasi taqdimoti bo'lib o'tdi

Prezident Shavkat Mirziyoyev hududlar rivoji va aholi hayoti bilan yaqindan tanishish, yangi istiqbolli rejalarni belgilash maqsadida 1-may kuni Xorazm viloyatiga keldi.

Tashrif chog‘ida davlatimiz rahbariga Urganch aeroportni modernizatsiya qilish va boshqaruvga berish loyihasi haqida axborot berildi.

Bu borada 2024-yil 1-avgustda e’lon qilingan ochiq tender ikki bosqichda o‘tkazilib, unda Fransiya, Koreya, Turkiya, Qatar kabi davlatlardan sakkizta kompaniya ishtirok etdi. Yakunda idoralararo tender komissiyasining qarori bilan Koreya Respublikasining Incheon International Airport Corporation kompaniyasi g‘olib deb topildi.

Prezidentimiz ushbu kompaniya va loyiha rahbarlari bilan suhbatlashdi. Kompaniya prezidenti Inchon xalqaro aeroporti sig‘imi bo‘yicha dunyoda uchinchi o‘rinda turishi, servis bo‘yicha yetakchilardan biri ekanini aytdi. Urganch kompaniyaning ikkinchi aeroporti bo‘lishini ta’kidlab, uni yangilash va boshqarish rejalarini ma’lum qildi.

Davlatimiz rahbari bunday ilg‘or kompaniya bilan sheriklikdan xursandligini ta’kidlab, o‘zaro manfaatli hamkorlikni kengaytirish bo‘yicha fikrlarini bildirdi.

- Xorazmda ko‘plab zamonaviy mehmonxonalar, dam olish va savdo markazlari barpo etayapmiz. Kelajakda sayyohlar oqimini 5 millionga yetkazishni maqsad qilganmiz. Buni aeroport bilan hamohang qilsak, o‘zaro manfaatli bo‘ladi, daromad ko‘payadi, - dedi davlat rahbari.

Xorijiy aviakompaniyalar bilan hamkorlikda yangi samolyotlar olib kelib, yo'lovchi tashuvlarni oshirish bo‘yicha fikrlar bildirildi. Prezident mazkur hamkorlikdan oqilona foydalanib, servis bo‘yicha Koreya tajribasini o‘rganish, mutaxassislarimizni o‘qitish va malakasini oshirish zarurligini ta’kidladi.

Loyihaning umumiy qiymati 223 million AQSH dollari bo‘lib, uning doirasida yangi uchish-qo‘nish yo‘lagi, yo‘lovchi va yuk terminallari qurish, “ICAO” talablariga javob beruvchi yoritish-signal qurilmalari o‘rnatish, maxsus texnikalar xarid qilish rejalashtirilgan.

Qurilish-rekonstruksiya ishlari 2025-2027-yillar davomida amalga oshiriladi va natijada aeroport Boeing 747 va Airbus 350 kabi yirik havo kemalarni qabul qilish imkoniga ega bo‘ladi. Aerovokzal maydoni 39 ming kvadrat metrga yetkazilib, soatiga 1300 nafar yo‘lovchiga xizmat ko‘rsatish imkoni yaratiladi. Prezidentga bo‘lajak terminal loyihasi ham taqdimot qilindi. Prezidentimiz uning ichki va tashqi qiyofasida milliy ruhni aks ettirish bo‘yicha tavsiyalar berdi.

Shunday qilib, “Urganch” aeroporti Xorazmning xorijlik sayyohlar uchun jozibadorligini oshirishga va butun mamlakat aviatsiya sanoatini rivojlantirishga xizmat qiluvchi eng qulay havo markazlaridan biriga aylanadi.

02 May, 2025