Clinics and Pharmacies

Transport universiteti talabalari Toshkent aeroportiga tashrif buyurishdi

Malakali kadrlar tayyorlash va zamonaviy transport infratuzilmasini rivojlantirish O‘zbekiston davlat siyosatining muhim yo‘nalishlari bo‘lib qolmoqda. Tegishli vazifalar O‘zbekiston Respublikasi Prezidentining fuqaro aviatsiyasini modernizatsiya qilish va sohaning kadrlar salohiyatini mustahkamlashga qaratilgan PF–5647 va PF–193-sonli farmonlarida belgilangan.

Ushbu ishlar doirasida 18-fevral kuni Toshkent davlat transport universiteti talabalari Toshkent xalqaro aeroportiga tashrif buyurib, mamlakatning eng yirik havo bandargohi faoliyatining amaliy jihatlari bilan tanishdilar.

Bo‘lajak mutaxassislarga aeroportni boshqarish tizimi, operatsion jarayonlarni muvofiqlashtirish, faoliyatni monitoring qilishda raqamli yechimlardan foydalanish va xavfsizlikni ta’minlash haqida so‘zlab berildi. Rivojlanish masalalari: aviakompaniyalar bilan hamkorlik, yo‘nalishlar tarmog‘ini kengaytirish, yo‘lovchi oqimini tahlil qilish va servis sifatini oshirishga alohida e’tibor qaratildi.

Ochiq muloqot davomida talabalar aeroport mutaxassislariga o‘zlarini qiziqtirgan savollarini berishdi, amaliyot o‘tash imkoniyatlari va aviatsiya sohasida ishga joylashish istiqbollari haqida ma’lumot olishdi.

Bunday uchrashuvlar ta’lim va amaliyot o‘rtasidagi bog‘liqlikni mustahkamlashga xizmat qiladi hamda bo‘lajak mutaxassislarga zamonaviy aviatsiya sanoati ishini yaxshiroq tushunish imkonini beradi.

20 Feb, 2026